nun pozzu chiangiri

Nun pozzi chiangiri
ca l'occhi mia su sicchi
e lu me cori è comu u balatuni

La vita m'arriddussi
asciuttu e mazziatu
comu na carrittata di pirciali

Iu nun sugnu pueta
odiu lu rusignolu li ciali
lu vinticeddu ca accarizza l'erba
li fogli ca cadinu ccu ll'ali

Amu li furturati
li venti ca strammianu li negghi
e annettanu l'aria e lu cielu

Iu nun sugnu pueta
e mancu pisci greviu d'acqua duci
sugnu un pisci mmistinu
abbituatu a li mari funnuti

Iu nun sugnu pueta
si poesia significa
la luna a pinnuluni
ca aggiarnia li facci di li ziti

Ammia la mezzaluna mi piaci
quannu luci dintra lu
biancu di l'ucchi a lu voi

Iu nun sugnu pueta
ma siddu è puisia
affunnari li manu
ntra lu cori di l'omini
patuti e senza spranza
ma siddu è puisia sciogliri cchiacchi a lu coddu
grapiri l'occhi a cui nun vidi
dari la ntisa a li surdi
e rumpiri catini e lazzi e liami

Ma siddu è puisia
chimari ntra lu funnachi e li grutti
lo genti persi abbannunati e rutti
e dari la vuci all'antu

all'omini aggubbati supra la terra
ca suca sangu e suduri
ncangiu di pani picca e alivi salati

Ma siddu è puisia scippari ntra lu
funnu di li surfara
la carni cristiana ca squaglia e si cunsuma
cunnannata a lu 'nfernu

Ma siddu è puisia vulìri
milli centumila muccatura bianchi
p'assuppari l'occhi abbuttati di chiantu
di cu travaglia senza bbentu e sosta
e vuliri tutta la terra un gran jardinu
di pampoii e di juri
ppi arrofriscari ntra lu su caminu
li pedi nudi di li puvireddi

ma siddu è puisia
farisi milli cori e milli vrazza
ed abbrazzari mammi puvireddi
sicchi di tempu a la malipatenza
ccu li carusi mmrazza
senza latti a li minni
quattr'ossa stritti ntra li petti
bramanti d'amuri

Datimi na vuci putenti
ca pueta mi sentu
datimi un stinnardu di focu
appressu ammia li schiavi di la terra
na jumara di vuci e di canzuni
li strazzi all'aria li strazzi all'aria
assammarati di chiantu e di sangu
assammarati di chiantu e di sangu

Nun sugnu pueta, di Ignazio Buttitta